Qəzza zolağı və İordan çayının qərb sahili vahid bölgənin ayrılmaz hissələridir və fələstinlilər heç vaxt öz torpaqlarından didərgin düşmələrinə icazə verməyəcəklər. Bunu Fələstin Dövlətinin prezidenti Mahmud Abbas deyib.
“İsrailin apardığı qırğın müharibəsi bizim [Fələstin] ərazilərimizi məhv etməyəcək, biz qələbə və müstəqillik əldə olunana qədər torpaqlarımızda mübarizəni əzmlə davam etdirəcəyik”, – deyə WAFA -a Abbasdan sitat gətirib. O əlavə edib ki, “Qüds də daxil olmaqla İordan çayının qərb sahili və Qəzza zolağı bölünə bilməyən vahid coğrafi bölgədir”. Abbas vurğulayıb ki, fələstinlilər “Qəzzadan və ya İordan çayının qərb sahilindən köçməyə heç vaxt icazə verməyəcəklər”.”Qəzza işğal olunmuş ərazilərin bir hissəsidir və biz onun bir parçasından da imtina etməyəcəyik və sektor üçün məsuliyyətdən əl çəkməyəcəyik”, – Abbas deyib.
Fələstin lideri qeyd edib ki, “hərbi həll yolları heç kimə sülh və sabitlik gətirməyəcək, əksinə, bütün regionu partlayış riski ilə üz-üzə qoyacaq”. Abbas vurğulayıb ki, yeganə həll yolu “Fələstin xalqının müstəqillik haqqının tanınması və beynəlxalq sülh konfransı vasitəsilə problemin beynəlxalq hüquq əsasında siyasi həllinin axtarılmasıdır”. (Tass)
