ABŞ-ın dövlət katibi Antoni Blinken İsrail prezidenti İsaak Hersoqla Təl-Əvivdə keçirdiyi görüşdə İordan çayının qərb sahilində vəziyyətin gərginliyini azaltmağa çağırıb. Bu barədə Amerika Xarici İşlər Nazirliyinin mətbuat xidmətinin rəhbəri Metyu Miller yazılı açıqlamasında bildirib.
“Dövlət katibi Blinken İordan çayının qərb sahilində gərginliyin azaldılmasının zəruriliyini vurğuladı, o cümlədən İsrailin Fələstinli mülki şəxslərə qarşı zorakılıqlara görə ekstremist məskunlaşanları məsuliyyətə cəlb etməsi”, – bəyanatda deyilir. Tərəflər həmçinin Fələstinin radikal HƏMAS hərəkatı tərəfindən saxlanılan girovların azad edilməsi üçün birgə səylərin davam etdirilməsi və Qəzza zolağına humanitar yardımın tədarükünün artırılmasını müzakirə ediblər.
Blinken Qüdsdə İsrailin baş naziri Benyamin Netanyahu ilə də görüşüb. Onlar İordan çayının qərb sahilindəki vəziyyəti, girovların azad edilməsini və humanitar yardımın çatdırılmasını müzakirə ediblər. “Dövlət katibi ABŞ-ın beynəlxalq humanitar hüquqa uyğun olaraq İsrailin terror zorakılığından özünümüdafiə hüququnu dəstəklədiyini vurğuladı və İsraili mülki şəxslərə zərər verməmək üçün mümkün olan hər şeyi etməyə çağırdı”, – Dövlət Departamentinin sözçüsü bildirib. (Tass)