ABŞ Qəzza zolağının cənubundakı Rəfah şəhərində İsrail hərbçilərinin hərəkətlərini izləməyə davam edəcək. Bunu jurnalistlər üçün keçirdiyi brifinqdə ABŞ-ın milli təhlükəsizlik üzrə köməkçisi Ceyk Sallivan deyib.
Onun sözlərinə görə, bu günə qədər İsrailin Rəfahdakı əməliyyatı “məqsədli və məhdud xarakter daşıyır” və Birləşmiş Ştatlar şəhərin sıx məskunlaşdığı ərazilərdə “genişmiqyaslı hərbi əməliyyat” keçirməsinə dair heç bir əlamət görmür. “Bunun hara aparacağını hələ bilmirik. İsrailin bizə söylədiklərinə və irəli sürdükləri planlara sadiq olub-olmadığını və ya başqa bir şeyin baş verib-verməyəcəyini görmək üçün monitorinq və qiymətləndirməyə davam edəcəyik” deyib Sullivan.
Mayın 6-da İsrail ordusu şərqi Rəfah əhalisinin təxliyyəsi üçün hazırlıqlara başladığını elan edib. Ertəsi gün hərbçilər Rəfahda əməliyyata başladığını və Qəzza zolağının Misirlə sərhədindəki eyniadlı sərhəd-keçid məntəqəsini nəzarətə götürdüyünü açıqlayıb. (Tass)