ABŞ eyni vaxtda həm İsrailə, həm də Ukraynaya hərbi yardım göstərə bilər. Bu barədə ABŞ-ın maliyyə naziri Canet Yellen Sky News telekanalına müsahibəsində bildirib.
“Amerika, şübhəsiz ki, İsraili dəstəkləməyə və İsrailə lazımi hərbi yardım göstərməyə qadirdir. Biz eyni zamanda Rusiyaya qarşı mübarizədə Ukraynanı dəstəkləyə bilərik və etməliyik”, – o deyib. Yellen ümid etdiyini bildirib ki, ABŞ Nümayəndələr Palatasına yeni spiker seçildikdən sonra Ağ Ev İsrail və Ukraynaya əlavə yardıma ümid edə biləcək. “Biz həm İsrail, həm də Ukrayna üçün vəsait tapmalıyıq. Bu, prioritetdir”, – o əlavə edib.
Yaxın Şərqdəki münaqişənin qlobal iqtisadiyyata təsirindən danışan Yellen tələsik nəticələrə gəlmək barədə xəbərdarlıq edib. “[Münaqişənin kəskinləşməsi nəticəsində] əhəmiyyətli nəticələrin olub-olmayacağı barədə spekulyasiya etmək hələ tezdir. Bu, hərbi əməliyyatların İsrail və Qəzza zolağından kənara keçib-keçməməsindən asılıdır. Biz belə bir ssenaridən qaçmaq istərdik”, – amerikalı nazir bildirib. (Tass)
