“Agro Food İnvestments” qrupa daxil olan “Grand Agro” MMC-nin əməkdaşları Azərbaycan Dövlət Aqrar Universitetinin (ADAU) tələbələri ilə görüş keçiriblər.
AZƏRTAC-ın bölgə müxbiri xəbər verir ki, görüşdə AFİ Qrupun İnsan resursları departamentinin müdiri Fərid Nəcəfov, “Grand Agro” MMC-nin İnsan resursları şöbəsinin müdiri Emil İbişov və baş mütəxəssis Leyla Ələkbərova iştirak ediblər.
Tədbirin məqsədi ADAU-da “Grand Agro” MMC tərəfindən istifadəyə veriləcək AFİ Karyera Mərkəzinin fəaliyyəti haqqında tələbələri məlumatlandırmaq olub.
F. Nəcəfov bildirib ki, Azərbaycanın aparıcı şirkətlər qrupu olan AFİ Qrupa 10-a yaxın şirkət daxildir. Bu şirkətlər Bakıda və regionlarda fəaliyyət göstərərək ölkəmizdə aqrar sahənin inkişafına öz töhfələrini verirlər. Daha sonra AFİ Karyera Mərkəzinin fəaliyyət istiqamətlərindən tələbələrə bəhs olunub.
Diqqətə çatdırılıb ki, layihənin məqsədi “aqronomluq”, “bağçılıq”, “torpaqşünaslıq və aqrokimya”, “meliorasiya mühəndisliyi”, “aqromühəndislik” və “bitki mühafizəsi” ixtisasları üzrə tələbələri ödənişli təcrübə proqramından faydalanmağa dəvət etməkdir.
Həmçinin bu təcrübə proqramında tələbəyə 600-800 AZN arası təqaüd şirkət tərəfindən ödəniləcək. Qeydiyyatdan keçən tələbələr ixtisaslarına dair test imtahanından keçdikdən sonra müsahibə mərhələsinə şans qazanacaqlar. Müsahibədə tələblərə cavab verən namizədlər 15-20 nəfər olmaqla təcrübə proqramında iştirak edə biləcəklər. Bu tələbələr mütəmadi olaraq yerli və xarici mütəxəssislərdən nəzəri və praktik biliklər alacaq, həmçinin onların praktik biliklərini gücləndirmək üçün xarici ölkələrə səfəri də şirkət tərəfindən təmin olunacaq.
Sonda uğurlu olan namizədlər sertifikat əldə edərək şirkətlər qrupunda işlə təmin olmaq imkanı qazanacaqlar.