Noyabrın 28-də Muzey Mərkəzində Azərbaycan Dövlət Mədəniyyət və İncəsənət Universitetinin (ADMİU) 100 illik yubileyinə həsr olunmuş sərginin açılış mərasimi keçirilib.
AZƏRTAC xəbər verir ki, sərgidə universitetin Rəssamlıq fakültəsinin müəllim və tələbələrinin əsərləri nümayiş olunub.
Mərasimdə çıxış edən ADMİU-nun rektoru professor Ceyran Mahmudova 2023-cü ilin ölkəmizlə yanaşı, Mədəniyyət və İncəsənət Universiteti üçün də əlamətdar olduğunu deyib. O, Ulu Öndər Heydər Əliyevin 100 illik yubileyi münasibətilə Prezidentin Sərəncamına əsasən Azərbaycanda “Heydər Əliyev İli” adlandırılan 2023-cü ildə rəhbəri olduğu ali təhsil ocağının da 100 yaşının qeyd edilməsinin qürurverici olduğunu vurğulayıb. Prezident İlham Əliyevin ADMİU-nun 100 illik yubileyinin qeyd edilməsi ilə bağlı Sərəncam imzaladığını xatırladan rektor il boyunca hər iki əlamətdar tarix münasibətilə maraqlı tədbirlər keçirildiyini, “Yüz ilin rəngləri” adlı sərginin də onlardan biri olduğunu əlavə edib.
Tədbirdə Azərbaycan Rəssamlar İttifaqının sədri, Xalq rəssamı Fərhad Xəlilov, Xalq rəssamı, professor Arif Əziz, Xalq rəssamı Xanlar Əhmədov və başqaları çıxış ediblər.
Sonra tədbir iştirakçıları sərgi ilə tanış olublar.