Azərbaycan Dövlət Pedaqoji Universitetində (ADPU) Özbəkistanın Cizzax Dövlət Pedaqoji Universiteti ilə əməkdaşlıq çərçivəsində “Ədəbi əlaqələr – yaradıcılıq prosesinin güzgüsü” adlı antologiyanın təqdimatı keçirilib.
Bu barədə AZƏRTAC-a ADPU-dan bildirilib. Qeyd edilib ki, antologiya cari ilin aprel ayında Azərbaycan Dövlət Pedaqoji Universiteti, universitetdə fəaliyyət göstərən Türkoloji Mərkəz və Cizzax Dövlət Pedaqoji Universitetinin birgə əməkdaşlığı əsasında hazırlanaraq çap olunub. Azərbaycan və türk dillərində hazırlanmış antologiyaya Özbəkistan və Azərbaycandan filologiya, pedaqogika sahələrində çalışan yüksəkixtisaslı alimlərin qısa avtobioqrafiyaları, elmi məqalələri daxil edilib. Kitabın “Ön söz”ü Cizzax Dövlət Pedaqoji Universitetinin rektoru professor Şövkət Şərifova və Azərbaycan Dövlət Pedaqoji Universitetinin beynəlxalq əlaqələr üzrə prorektoru professor Mahirə Hüseynovaya aiddir.
Filologiya və pedaqogika mütəxəssisləri üçün unikal hədiyyə olan və tərkibində 88 elmi məqalə yer alan bu antologiya tədqiqat aparan dilçilər, ədəbiyyatşünaslar və gənc tədqiqatçılar üçün nəzərdə tutulub. Azərbaycan və Özbəkistan arasındakı dostluq və hərtərəfli əməkdaşlıq əlaqələrinin gücləndirməyə xidmət edən, elmi-praktik çalışmalardan biri olan antologiya bütün Türk dünyasının oxucuları üçün faydalı mənbədir.
Təqdimat mərasimində ADPU-nun rektoru professor Cəfər Cəfərov, professorlar Mahirə Hüseynova, Asəf Zamanov və Fikrət Rzayev, Filologiya fakültəsinin dekanı Könül Həsənova, universitetin professor-müəllim heyəti, eləcə də Özbəkistanın Cizzax Dövlət Pedaqoji Universiteti, Fərqanə Dövlət Universiteti, Daşkənd Özbək Dili və Ədəbiyyatı Universiteti, Andijan Dövlət Pedaqoji Universiteti, Alfraganus Universiteti və Kazan (Volqa) Federal Universitetindən olan professor-müəllim heyəti iştirak edib.