Amerika administrasiyası hesab edir ki, İsrail Qəzza zolağında humanitar yardımın paylanmasını gözləyən fələstinlilərin toplantısına hücumun şərtləri ilə bağlı hərtərəfli araşdırma aparmalıdır. Bu barədə jurnalistlərə Ağ Evin mətbuat katibinin birinci müavini Oliviya Dalton məlumat verib.
“Biz hesab edirik ki, bu son hadisələr hərtərəfli araşdırılmalıdır. Biz [baş verənlər haqqında] məlumat əldə etmək üçün bu səhər İsrail hökuməti ilə əlaqə saxladıq və onlardan hazırkı faciəyə səbəb olan hallar barədə araşdırma və əlavə məlumat vermələrini xahiş etdik “Ağ Evin sözçüsü bildirib.
Öz növbəsində, ABŞ Dövlət Departamentinin mətbuat xidmətinin rəhbəri Metyu Miller brifinqdə Vaşinqtonun “təcili olaraq məlumat topladığını” qeyd edib. “Biz istintaqı izləyəcəyik və cavablar axtaracağıq” deyən Miller, hadisənin Qəzza zolağına humanitar yardımın “artırılması və saxlanmasının zəruriliyini göstərdiyini” vurğulayıb.
Fələstin anklavının Səhiyyə Nazirliyinin rəsmi nümayəndəsi Əşrəf əl-Qudra daha əvvəl bildirib ki, Qəzza zolağındakı həkimlər hazırda İsrail qüvvələrinin hücumu nəticəsində Nablusi bölgəsində 112 nəfərin öldüyünü təsdiq edə bilərlər. Onun verdiyi məlumata görə, 760 nəfər yaralanıb.