Qarabağ Regional Mədəniyyət İdarəsinin tabeliyində fəaliyyət göstərən Ağcabədi şəhər Üzeyir Hacıbəyli adına uşaq incəsənət məktəbi 18 Sentyabr – Milli Musiqi Günü münasibətilə konsert proqramı ilə çıxış edib.
AZƏRTAC-ın bölgə müxbiri xəbər verir ki, əvvəlcə Azərbaycanın Dövlət Himni səsləndirilib, şəhidlərin xatirəsi bir dəqiqəlik sükutla yad edilib.
Tədbirdə dahi bəstəkar, peşəkar musiqi sənətimizin və milli operamızın banisi Üzeyir Hacıbəylinin keçdiyi şərəfli ömür yolu, həyat və yaradıcılığı haqqında məlumat verilib, milli musiqi mədəniyyətinin inkişafında əvəzsiz xidmətlərindən, dünya musiqi sənətinə verdiyi töhfələrdən danışılıb.
Daha sonra məktəbin müəllimlərdən ibarət instrumental ansamblının hazırladığı “Koroğlu” uvertürası təqdim edilib. Xoreoqrafiya sinfinin şagirdləri rəqsləri ilə tədbirə rəng qatıblar. Məktəbin müəllim və şagirdləri dahi bəstəkarın musiqilərini ifa ediblər.