İƏT Təhsil İnstitutunun prezidenti Mehmet Akif Kireççi gələcəyin təhsilsiz mümkün olmadığını vurğulayıb: “Ölkələr arasında tələbə mübadiləsi önəmlidir. Məsələn, hazırda Türkiyə və İran arasında bu sahədə addımlar atılır. Azərbaycan və Orta Asiya ölkələri arasında musiqilər oxşardır, bu məsələyə də diqqət yönəldilə bilər”.
Özbəkistanlı fəal Şaxnozakhon Rakhmanova bildirib ki, Azərbaycan COP29-a, indi isə İƏT forumlarına, sammitinə ev sahibliyi edir: “Bu, sülhlə bağlı mühüm mesajdlr”.
İƏT Elm Fondunun prezidenti Sayed Komali Tayabi hesab edir ki, elmə xüsusi diqqət yetirilməlidir, elm varsa, cəmiyyət də inkişaf edir: “Dayanıqlı inkişafın arxasında insan kapitalı dayanır. İƏT regionu, o cümlədən Azərbaycan böyük potensiala malikdir, çünki əhalinin yarıdan çoxu gənclərdir. Bu gənclərin potensialından istifadə edilməlidir. Ona görə də region ölkələrini daha çox innovasiyalara yönəlik siyasət həyata keçirməyə çağırırıq”.
Azərbaycan Xarici İşlər Nazirliyinin İqtisadi Əməkdaşlıq İdarəsinin rəisi Elmar Məmmədov rəsmi Bakının 14 qlobal, 7 regional təşəbbüslə çıxış etdiyini nəzərə çatdırıb: “COP29 çərçivəsində həyata keçirilən təşəbbüsləri bu sırada xüsusi qeyd etmək istəyirəm. Bakıda qəbul olunmuş Bələdçi Prinsipləri hazırda ölkələr tərəfindən təsdiqlənir. Keçirilən COR-la bağlı koalisiya da formalaşmaqdadır. İqlim maliyyəsi və ticarət investisiyası da COP29 çərçivəsində mühüm nailiyyətdir. İlk dəfə bu iki sahəni bir araya gətirmişdik. Bu, dayanıqlı iqlim baxımından önəmlidir. Bu tədbir – İƏT sammiti tarixi əhəmiyyət daşıyır, ilk dəfə Azərbaycan Prezidenti İlham Əliyevin təşəbbüsü ilə İƏT həftəsi keçirilir” .
Panel müzakirələrlə davam edib.