TASS-ın müxbiri xəbər verir ki, Aİ erməni diasporunun nümayəndələri Brüsselin Avrokvartalında Dağlıq Qarabağın Azərbaycanın tərkibinə daxil edilməsinə qarşı etiraz aksiyası keçirərək, Aİ-ni bu ərazini və onun əhalisini qorumağa və Bakıya qarşı sanksiyalar tətbiq etməyə çağırıblar. Polisin hesablamalarına görə, aksiyada 1 minə yaxın adam iştirak edib.
Etirazçılar əllərində Ermənistan bayraqları və “Artsax” (tanınmamış Dağlıq Qarabağ Respublikası), “Ermənistana kömək edək”, “Cinayətkarlara qarşı sanksiyalar”, “Aİ, ermənilərin qanı sizin qaz borularınıza axır” sözləri yazılmış çoxsaylı əl istehsalı plakatlar tutublar. Mitinqdə erməni mahnıları səsləndirilib.
Etiraz mitinqində Artsax ermənilərini müdafiə etmək çağırışı ilə Avropa Komissiyası və Aİ Şurasına ünvanlanmış petisiya üçün imzalar toplanıb.
Mitinqin iştirakçısı, Fransa vətəndaşı Aravik bildirib ki, “Avropa İttifaqı bütün Artsax ermənilərinin hüquqlarına tam riayət olunmasını təmin etmək, qaçqınların geri qayıtmasını asanlaşdırmaq və onlara Azərbaycan tərəfindən hər hansı təzyiqin qarşısını almaq üçün bütün təsirindən istifadə etməlidir”.
Mitinqdə çıxış edən fəallar Avropa Komissiyasını Azərbaycanla genişləndirilmiş qaz tərəfdaşlığının inkişafını dayandırmağa və Bakıya qarşı sanksiyalar tətbiq etməyə çağırıblar. Mitinqin təşkilatçılarının verdiyi məlumata görə, Brüsselə Belçika, Fransa, Almaniya, Hollandiya, İspaniya və İtaliyadan olan ermənilər toplaşıb. Mitinqə yerli hakimiyyət orqanları icazə verib və polis nəzarəti altında insidentsiz keçirilib. (Tass)
