Görkəmli alim və ictimai-siyasi xadim akademik Cəlal Əliyevin anadan olmasından 97-ci il keçir. Bu münasibətlə Azərbaycan Respublikası Elm və Təhsil Nazirliyi Molekulyar Biologiya və Biotexnologiyalar İnstitutunun baş direktoru, AMEA-nın vitse-prezidenti akademik İradə Hüseynovanın rəhbərliyi ilə institutun kollektivi və akademik Cəlal Əliyev elmi məktəbinin yetirmələri alimin Fəxri xiyabandakı məzarını ziyarət ediblər. Həmçinin Kənd Təsərrüfatı Nazirliyinin Əkinçilik Elmi-Tədqiqat İnstitutunun əməkdaşları akademik Cəlal Əliyevin məzarını ziyarət edərək onun elmə və kənd təsərrüfatına verdiyi əvəzsiz töhfələrini dərin minnətdarlıqla xatırlayıblar.
Bu barədə AZƏRTAC-a Molekulyar Biologiya və Biotexnologiyalar İnstitutundan məlumat verilib.
Anım mərasimində iştirak edənlər akademikin əziz xatirəsini ehtiramla yad edərək, məzarı üzərinə əklil və gül dəstələri düzüblər.
Akademik Cəlal Əliyevin zəngin elmi irsi və onun yaratdığı məktəb bu gün də Azərbaycan elminin inkişafına xidmət edir və yeni nəsil alimlərə örnək olur.