Türkiyənin İstanbul Cərrahpaşa Universitetində “Sənaye, tətbiqli idarəetmə və optimallaşdırma” mövzusunda 9-cu beynəlxalq elmi konfrans (The 9th International Conference on Control and Optimization with Industrial Applications – COIA-2024) keçirilib.
Azərbaycan Milli Elmlər Akademiyasından AZƏRTAC-a bildirilib ki, tədbir Azərbaycan Respublikası Rəqəmsal İnkişaf və Nəqliyyat Nazirliyi, İstanbul Cərrahpaşa Universiteti, Ağrı İbrahim Çeçen Universiteti və Bakı Dövlət Universitetinin nəzdində Tətbiqi Riyaziyyat Elmi-Tədqiqat İnstitutunun birgə təşkilatçılığı ilə reallaşıb.
Konfransın açılışında Türkiyənin millət vəkili Şamil Ayrım, İstanbul Cərrahpaşa Universitetinin rektor köməkçisi professor Erol İncə, “Katoder” şirkətinin rəhbəri Sabiha Gül Doğan və konfransın təşkilat komitəsinin həmsədrləri – akademik Fikrət Əliyev və Ahmet Ocak Akdemir çıxış ediblər.
Akademik Fikrət Əliyev tədbirdə elmi nəticələrin sənaye və iqtisadiyyatda tətbiqindən, optimallaşdırma və idarəetmənin aspektlərindən danışıb, beynəlxalq konfransın əhəmiyyətini vurğulayıb.