Almaniya Hərbi Dəniz Qüvvələri pilotsuz nəqliyyat vasitələrinin istifadəsini genişləndirmək niyyətindədir və onlardan sualtı kritik infrastrukturun, o cümlədən qaz kəmərlərinin monitorinqi üçün istifadə etməyi planlaşdırır. Bunu “The Japan Times” qəzetinə Almaniya Hərbi Dəniz Qüvvələrinin baş komandanı, vitse-admiral Yan Kristian Kaak deyib.
“Biz pilotsuz sistemlər sahəsində texnoloji inkişafların təklif etdiyi imkanları da görürük və bu sistemlərin istifadəsi əsgərlərimiz üçün mümkün təhlükələri minimuma endirəcək Xüsusilə, qaz kəmərləri kimi kritik sualtı infrastrukturun monitorinqini nəzərdə tuturam”, – deyə vitse-admiral vurğulayıb.
Almaniya Hərbi Dəniz Qüvvələrinin Baş Komandanı həmçinin bildirib ki, 2035-ci ilə qədər Berlin öz donanmasını müasir freqatlar, sualtı qayıqlar və açıq dənizlərdə geniş spektrli tapşırıqların yerinə yetirilməsi üçün yararlı olan köməkçi gəmilərlə təchiz etməyi planlaşdırır. O, alman donanmasının ucqar sularda, o cümlədən Hind-Sakit okean regionunda əməliyyat imkanlarını artırmaq niyyətini vurğulayıb. (Tass)