Berlin “Taurus” qanadlı raketlərinin Ukraynaya ötürülməsini nəzərdən keçirmir. Bunu Almaniyanın müdafiə naziri Boris Pistorius Kiyevdə Vladimir Zelenski ilə görüşündən sonra deyib.
O, jurnalistlərlə söhbəti zamanı məsələ ilə bağlı sualı belə cavablandırıb: “Məndən soruşdunuz ki, biz bunu nəzərdən keçiririk? Mən sizə cavab verirəm: yox!” Müvafiq video fraqmenti UNIAN agentliyi dərc edib.
Öz növbəsində Zelenski bildirib ki, tərəflərin Kiyevə alman IRIS-T hava hücumundan müdafiə sistemlərinin tədarükü ilə bağlı müzakirə etdiyi plan üç ilə hesablanıb.
Pistorius səfərindən əvvəl bildirib ki, Kiyevdə keçiriləcək danışıqlarda “gələcəkdə Almaniya və digər avropalıların dəstəyinin necə olacağı, məsələn, sənaye əməkdaşlığı, eləcə də digər yardım növləri müzakirə olunacaq”.
Almaniya Ukraynaya ABŞ-dan sonra ikinci ən böyük silah tədarükçüsüdür. Ukraynada münaqişə başlayandan bəri Almaniya Kiyevə 40 milyard avrodan çox müxtəlif növ yardım edib. Rusiya tərəfi dəfələrlə qeyd edib ki, Kiyev rejimini silahla doldurmaq yalnız münaqişənin uzanmasına gətirib çıxarır. (Tass)