Almaniya Xarici İşlər Nazirliyi Qəzza zolağında Nuseyrata edilən hava hücumunu pisləyib və qeyd edib ki, yardım işçiləri raket hücumlarının qurbanı olmamalıdır.
“Humanitar işçilər heç vaxt raket hücumlarının qurbanı olmamalıdırlar”, – deyə Almaniya Xarici İşlər Nazirliyi X (keçmiş Twitter) sosial şəbəkəsindəki səhifəsində dərc edilmiş bəyanatda bildirib. Departament UNRWA-nın Qəzzada həyati əhəmiyyətli yardım göstərdiyini və bunun üçün BMT-nin mandatına sahib olduğunu vurğulayıb. “İsrail ordusu BMT əməkdaşlarının və humanitar işçilərin qorunmasına cavabdehdir” deyə Almaniya Xarici İşlər Nazirliyi yekunlaşdırıb.
Bundan əvvəl UNRWA məlumat vermişdi ki, Qəzza zolağının mərkəzində yerləşən Nuseyrat qaçqın düşərgəsindəki məktəbə və ətrafına iki hava hücumu nəticəsində altı əməkdaşı həlak olub. Agentlik vurğuladı ki, bu, bir insidentdə həlak olan ən çox işçidir. Ölənlər arasında qaçqınların qəbulu mərkəzinin müdiri də var. (Tass)