Almaniya Gürcüstanda etiraz aksiyası iştirakçılarına və müxalifətçilərə qarşı zorakılıq tətbiqinə görə məsuliyyət daşıdığı iddia edilən 9 nəfərə səyahət qadağası qoyub. Bu barədə Almaniya Xarici İşlər Nazirliyinin mətbuat xidməti məlumat yayıb.
“Almaniya bu gün Gürcüstanda etirazçılara və müxalifətçilərə qarşı zorakılığa görə məsuliyyət daşıyan 9 nəfərin ölkəyə girişinə qadağa qoyub”, – bəyanatda deyilir. Departament bir daha bəyan edib ki, respublikadakı vəziyyət “narahatlığa səbəb olur”.
Dekabrın 20-də Avropa Komissiyası (AK) Gürcüstan rəsmiləri və diplomatları üçün vizasız rejimin dayandırılmasını rəsmən təklif edib. Təşəbbüslə bağlı icraedici qərar yanvarın ortalarına qədər, Aİ xarici işlər nazirləri Milad bayramlarından sonra Aİ Şurasının planlaşdırılan iclası üçün bir araya gələnə qədər qəbul edilməyəcək. Qərar yekdil olmalıdır, ona görə də AK təşəbbüsünün təsdiqlənəcəyinə zəmanət yoxdur.
Oktyabrın 26-da Gürcüstanda parlament seçkiləri keçirilib. Mərkəzi Seçki Komissiyasının yekun məlumatlarına görə, hakim “Gürcü arzusu – Demokratik Gürcüstan” partiyası 53,93% səslə qalib gələrək qanunverici orqandakı 150 yerdən 89-unu qazanıb. Noyabrın 4-dən müxalifət liderləri etiraz aksiyaları keçirirlər. (Tass)