“Report”un Komitəyə istinadən verdiyi məlumata görə, sədr “Belarus Respublikasının Arxitektura və Tikinti Nazirliyi ilə Azərbaycan Respublikasının Dövlət Şəhərsalma və Arxitektura Komitəsi arasında əməkdaşlığın aktivləşdirilməsinə dair Niyyət Memorandumu” sayəsində qurumlar arasında son illər ərzində şəhərsalma, memarlıq və tikinti sahələrində sıx əməkdaşlığın və geniş təcrübə mübadiləsinin mövcudluğundan məmnun olduğunu vurğulayıb.

A.Quliyev, həmçinin Azərbaycan Prezidenti İlham Əliyevin şəhərsalma sahəsində həyata keçirdiyi islahatların nəticələri, xüsusən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində işğaldan azad olunmuş ərazilərdə aparılan genişmiqyaslı tikinti- quruculuq işləri barədə qonaqlara ətraflı məlumat verib.

Geniş məlumata görə minnətdarlığını bildirən R. Parxamoviç son illər ərzində Belarusda tikinti sahəsində aparılan islahatlardan və yeniliklərdən, habelə Azərbaycan və Belarus arasında müxtəlif sahələrdə ikitərəfli əlaqələrin gücləndirilməsi imkanlarından söhbət açıb.

Görüş zamanı tərəflər şəhərsalma sahəsində dövlət inzibatçılığı, ölkələrimizdə yaşayış məntəqələrinin və tikinti obyektlərinin layihələndirilməsi üzrə əməkdaşlıq və qarşılıqlı əlaqələrin genişləndirilməsi imkanlarını da geniş müzakirə ediblər.