2016-cı ilin aprelində Ermənistan silahlı qüvvələrinin qoşunların təmas xəttində ardıcıl təxribatlarına cavab olaraq keçirilmiş əks-əməliyyat zamanı Azərbaycan Ordusu tarixi qələbə qazandı. Bu, Silahlı Qüvvələrimizin qələbə əzmini sübut etdi.Bu fikirləri “Report”a Aprel döyüşlərinin ildönümü barədə danışan Milli Məclisin deputatı Könül Nurullayeva deyib. Onun sözlərinə görə, aprel döyüşləri bir daha göstərdi ki, Azərbaycan Ordusu istənilən vaxt ərazi bütövlüyü və suverenliyimizi bərpa etməyə hazırdır:”Qəhrəman hərbçilərimiz təcavüzkar Ermənistan ordusuna ağır zərbələr endirərək iki min hektardan artıq ərazini işğaldan azad etdi. Dörd gün davam edən döyüşlərdə hərbi sahədə qazanılan uğurlar, azad olunan strateji yüksəkliklər Azərbaycanın mövqelərini daha da gücləndirdi. Lələtəpədə Azərbaycan bayrağı ucaldıldı, Cocuq Mərcanlı “Böyük Qayıdış”ın başlanğıcı oldu”.Deputat xatırladıb ki, Aprel zəfərindən 2 il sonra 2018-ci ilin mayında Naxçıvanın 1990-cı illərin əvvəllərində ermənilər tərəfindən zəbt edilmiş 11 min hektar torpağı Naxçıvan Əlahiddə Ümumqoşun Ordusu tərəfindən aparılmış uğurlu Günnut əməliyyatı nəticəsində azad olundu:”Elə həmin il, 2018-ci il iyunun 26-da Silahlı Qüvvələrin yaradılmasının 100 illik yubileyi münasibətilə Bakının Azadlıq meydanında keçirilən hərbi paradda 2016-cı ilin Aprel döyüşlərində, 2018-ci ilin Naxçıvan əməliyyatında işğalçılardan azad olunmuş torpaqlarda qaldırılmış Azərbaycan bayraqları nümayiş etdirildi. Paradda Ali Baş Komandan İlham Əliyev ölkəmizin ərazi bütövlüyünün mütləq bərpa olunacağını bəyan etdi. Aprel döyüşlərindən dərs çıxarmayan düşmən yenidən təxribatlara əl atırdı. 4 il sonra – 2020-ci ilin sentyabrında Ali Baş Komandan İlham Əliyevin rəhbərliyi ilə Azərbaycan xalqı dəmir yumruq kimi birləşərək işğalla barışmadığını sübut etdi”.K. Nurullayeva əlavə edib ki, 44 günlük Vətən müharibəsində Azərbaycan Ordusu Böyük Zəfər qazandı, ərazi bütövlüyü təmin olundu:”23 saatlıq antiterror əməliyyatı nəticəsində isə Azərbaycan öz suverenliyini bərpa etdi. Qürurlu tarixə malik olan Azərbaycan Ordusu bu gün özünün ən şanlı mərhələsini yaşayır. Bu gün Azərbaycanın timsalında bir daha əmin oluruq ki, güclü ordu dövlətin müstəqilliyinin qarantıdır.Bir sözlə, Aprel döyüşləri həm də Vətən müharibəsindəki əsas döyüşün ilkin təlimi kimi tarixə düşdü”.Xatırladaq ki, bu gün Azərbaycan Ordusunun qələbəsi ilə yekunlaşan tarixi Aprel döyüşlərinin başlanmasından 9 il ötür.Döyüşlər zamanı Azərbaycan Ordusu da ermənilərin mövqelərinə cavab zərbələri endirib, həyata keçirilən sürətli əks-həmlə zamanı 2 min hektardan artıq ərazi azad edilib və daha çox ərazi əməliyyat baxımından nəzarət altına keçib.Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər düşmən qüvvələrindən tam təmizlənib. Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli “Lələ təpə” adlandırılan yüksəklik də Azərbaycan Ordusunun nəzarətinə keçib.Aprel döyüşləri nəticəsində 320 erməni hərbçisi məhv edilib, 500-dən çoxu isə yaralanıb.
