“Report” bu barədə ASCO-ya istinadən xəbər verir.
Məlumata görə, qurumun İdarə Heyətinin sədri Rauf Vəliyev “Braemar”ın İcraçı direktoru Ceyms Gundinin rəhbərlik etdiyi nümayəndə heyəti ilə görüşüb.
Görüşdə R.Vəliyev qonaqlara rəhbərlik etdiyi şirkətin tarixi və göstərdiyi çoxşaxəli xidmətlər barədə ətraflı məlumat verib. O, bildirib ki, ASCO 165 illik zəngin tarixə malik gəmiçilik şirkəti kimi Xəzər dənizində və Xəzərdənkənar hövzələrdə müxtəlif növ yüklərin daşınmasını həyata keçirir. Şirkət həmçinin Xəzər dənizində neft-qaz kəşfiyyatı və hasilatı sənayesinə xidmət edən müxtəlif tip gəmiləri özündə birləşdirir.
C.Gundi isə təmsil etdiyi şirkət barədə geniş təqdimatla çıxış edib.
Görüşdə həmçinin tanker və quru yük daşıma bazarındakı mövcud vəziyyət də müzakirə edilib. Tərəflər əməkdaşlıq imkanlarından danışaraq birgə layihələr ətrafında səmərəli fikir mübadiləsi aparıblar.