Asim Mollazadə: Solçu və sağçı ekstremizm xalqlar üçün böyük təhlükədir

Avropa XX əsr faşizmi zamanı ekstremizmdən əziyyət çəkirdi. Bu, avropalılar üçün böyük faciə idi. Onu da nəzərə almalıyıq ki, bəd imperiya – Sovet İttifaqı onun nəzarəti altında olan xalqlar üçün də faciələr yaratdı: Qolodomor (böyük aclıq), Qırmızı Terror, kollektivləşmə. Solçu ekstremizmin də əsl siması haqqında hamı yaxşı məlumatlıdır. Bəd imperiyası dağılanda çoxlu KQB sənədləri açıldı. Bu fayllarda Sovet İttifaqının NATO ölkələrinə qarşı istifadə etdiyi texnologiyalar, xüsusilə də NATO ölkələrində xaos yaratmaq məqsədilə solçu və sağçı ekstremizmə kömək, maliyyə yardımı haqqında məlumatlar açıqlandı. Təəssüf ki, belə hallar hələ də davam edir.AZƏRTAC xəbər verir ki, bu fikirləri Milli Məclisin deputatı Asim Mollazadə AŞPA-nın payız sessiyası çərçivəsində “İfrat sağçı ideologiya: Avropada demokratiya və insan haqları üçün çağırışlar” adlı qətnamə layihəsinin müzakirəsi zamanı çıxışında söyləyib.

Sovet İttifaqı dağılmağa başlayanda bir sıra ölkələrdə münaqişə ocaqlarının yarandığını deyən deputat Ermənistanın həmin dövrdə Azərbaycan ərazisinin 20 faizini işğal etdiyini, yüz minlərlə insanı doğma yurdundan vəhşicəsinə didərgin saldığını, işğal edilmiş ərazilərdə uşaqları, qadınları qətlə yetirdiyini bildirib.

Qarabağda baş verənlərə toxunan A.Mollazadə bildirib: “Oradakı erməniləri Ermənistana göndərmək bu ölkəni cəzalandırmaq üçün onlardan istifadə etmək, Ermənistanda hərc-mərclik yaratmaq, hakimiyyəti yenidən Qarabağ klanına – qəddar klana vermək məqsədi daşıyır. Qarabağın erməni klanı qəddar klandır. Qarabağ klanının rəhbərlərinin əksəriyyəti hərbi cinayətkarlardır, uşaqları, qadınları öldürüblər, amma ifrat solçular bu prosesi başa düşmürlər.

Solçu və sağçı ekstremizm xalqlar üçün böyük təhlükədir. Ciddi inkişafdan, ifrat solçu və sağçıların yaratdığı nəhəng təhlükələrdən xəbərsizliyə son qoyan təhsil sistemini düzəltmək lazımdır”.