Azərbaycan Texnologiya Universitetində Elm və Təhsil Nazirliyi ilə birgə 8 Noyabr – Zəfər Gününə həsr olunmuş “İnnovativ ekosistemlərin inkişafında universitetlərin rolu” adlı respublika elmi-praktik konfransı keçirilib.AZƏRTAC-ın bölgə müxbiri xəbər verir ki, tədbirdən əvvəl universitet ərazisində Ümummilli Lider Heydər Əliyevin büstü, şəhidlər abidəsi və şəhidlər lövhəsi ziyarət edilib.Konfransda Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad olunub.Texnologiya Universitetinin rektoru Yaşar Ömərov çıxışında Ali Baş Komandan İlham Əliyevin rəhbərliyi ilə rəşadətli Azərbaycan Ordusunun torpaqlarımızı 30 illik işğaldan azad etməsindən və bu Zəfərin qazanılmasında xalq-dövlət-ordu birliyindən danışıb, işğaldan azad olunmuş ərazilərdə “ağıllı kənd”, “ağıllı şəhər” konsepsiyası əsasında aparılan quruculuq işlərindən söz açıb.Sonra Gəncə Şəhər İcra Hakimiyyətinin başçısı Niyazi Bayramov, Elm və Təhsil Nazirliyinin şöbə müdiri Turxan Süleyman, Azərbaycan Dövlət Neft və Sənaye Universitetinin rektoru Vazeh Əsgərov, YAP Gəncə şəhər təşkilatının sədri Bayram Aslanov, İnnovasiya və Rəqəmsal İnkişaf Agentliyinin Regional innovasiya proqramları meneceri Elxan Şükürov, “AzerGold” QSC-nin İdarə Heyəti sədrinin müşaviri Anar Abdullayev, Azərbaycan Beynəlxalq Bankının Korporativ və KOS seqment sahəsinin texniki rəhbəri Elnur Sadıqov, “Azersun Holding”in Süd İstehsalı Fabrikinin direktoru Fuad Məmmədov çıxış ediblər.Qeyd edək ki, konfransın məruzələr toplusuna 400-ə yaxın tezis qəbul olunub.İkigünlük respublika elmi-praktik konfransı 11 bölmədə hibrid formada işini davam etdirir.
