İsraillə radikal HƏMAS hərəkatı arasında münaqişə Avropa Birliyinin təhlükəsizliyi üçün ciddi nəticələr verə bilər. Bu fikri Avropanın daxili işlər üzrə komissarı Ylva Yohansson deyib.
İspaniyanın “El Pais” qəzetinə müsahibəsində o, “Münaqişə ilə bağlı terror təhlükəsinin artacağına dair böyük risk var” deyib. Avropa komissarının sözlərinə görə, “terrorçular Aİ-yə gələ bilər, lakin ən böyük risk Aİ-də artıq radikallaşmış insanların terror hücumları törədə bilməsidir”.
Avropa İttifaqı üzv dövlətlərdə riskləri və daxili təhlükəsizlik məsələlərini qiymətləndirmək səlahiyyətinə malik deyil, çünki bu sahə dövlətlərin özlərinin məsuliyyətidir. Buna baxmayaraq, Yohansson qeyd edib ki, o, Aİ-yə üzv ölkələrin Daxili İşlər Nazirliyinin rəhbərləri ilə əlaqələri gücləndirib. “Biz səssiz qalmayacağıq və [hipotetik] hücumun baş verməsini gözləməyəcəyik. Biz qarşısını almalıyıq, həm də qorumalı və hərəkətə keçməliyik” deyib.
Avropa komissarının sözlərinə görə, prioritetlərdən biri ictimai yerlərin və ibadət yerlərinin mühafizəsinin gücləndirilməsidir. Brüssel bu məqsədlər üçün Avropa fondlarını artıracaq “yeni müqavilə” üzərində işləyir. (Tass)