Artıq neçə illərdir ki, AMEA Nizami Gəncəvi adına Ədəbiyyat İnstitutunun “Azərbaycan-Türkmənistan-Özbəkistan ədəbi əlaqələri” şöbəsinin müdiri, filologiya elmləri doktoru Almaz Ülvi Binnətova Özbəkistanın müxtəlif ali məktəblərində “Nəvaişünaslıq” fənni üzrə ustad dərslərinə dəvət olunur. Ötən il alim iki həftə Xarəzm diyarında – Urgənc Dövlət Universitetində “Nəvaişünaslıq” fənnindən ustad dərsləri keçib. Çox böyük təəssüratlarla Vətənə dönən Almaz Ülvi bütün həyəcan və məhəbbət dolu səfər təəssüratlarını “Xarəzm heyrəti” (iki həftə Urgənc tələbələri ilə) adlı kitabında oxucularla bölüşüb.
AZƏRTAC xəbər verir ki, kitabda müəllif Özbəkistan Respublikası Xarəzm Vilayəti Urgənc Dövlət Universitetinin filologiya fakültəsinin tələbələri ilə görüşündən, onlara “Nəvaişünaslıq” fənni üzrə ustad dərsləri keçməsindən, tələbələrin səmimi ürək sözlərindən və Xarəzmin tarixi yerlərindən bəhs edib.
İki xalqın dostluq ənənələrinin davamı kimi belə səfərlərin aktual xarakter daşıması ilə yanaşı, tarixi əhəmiyyəti də diqqətəlayiqdir.
İnanırıq ki, kitabda yer alın xatirə və tarixi yerlərə aid məlumatlar oxucuların da marağına səbəb olacaq.
