Elm və Təhsil Nazirliyinin İdarəetmə Sistemləri İnstitutunun baş elmi işçisi akademik Asəf Hacıyev Bolqarıstan Elmlər Akademiyasının (BEA) Riyaziyyat və İnformatika İnstitutunun dəvəti ilə Sofiya şəhərində elmi ezamiyyətdə olub.İnstitutdan AZƏRTAC-a bildirilib ki, BEA-nın seminarında “Cihazları hərəkətdə olan kütləvi xidmət sistemlərində idarəetmə məsələləri” mövzusunda çıxış edən A.Hacıyev bu sahədə əldə etdiyi son nəticələr və mövcud problemlər barədə məlumat verib.Sonra akademik Asəf Hacıyev ehtimal nəzəriyyəsi sahəsində tanınmış alim, bir neçə önəmli əsərlərin müəllifi, professor Jordan Stoyanov və kompüter statistika sahəsində tanınmış alim, professor Vyaçeslav Valev ilə müasir elmi problemlərin həlli istiqamətində müzakirələr aparıb.Səfər çərçivəsində Asəf Hacıyev Bolqarıstan Elmlər Akademiyasının prezidenti akademik Yulian Revalski ilə də görüşüb. Görüşdə birgə əməkdaşlıq perspektivləri müzakirə olunub, Qara Dəniz İqtisadi Əməkdaşlıq Təşkilatının Parlament Məclisinin təşəbbüsü ilə Qara Dəniz ölkələrinin Elmlər Akademiyalarının Prezidentlərinin 2024-cü ildə keçirilmiş konfransı və 2025-ci ildə planlaşdırılan növbəti iclasın vacibliyi qeyd olunub. J.Revalski akademik A.Hacıyevi 2024-cü ilin oktyabr ayında planlaşdırılan Bolqarıstan Elmlər Akademiyasının 155 illiyinə həsr olunan təntənəli toplantısına dəvət edib.