Bu barədə AZƏRTAC-a Azərbaycan Dili və Mədəniyyəti Mərkəzindən məlumat verilib. Bildirilib ki, Azərbaycan milli geyimində uşaqlar Turizm Nazirliyinin himayəsi və Bolqarıstan Respublikasının vitse-prezidenti xanım İliana Yotovanın iştirakı ilə Çirpan şəhərində keçirilən Lavanda festivalının bayram yürüşündə iştirak ediblər.
Festivalın açılışında Mərkəzin direktoru Sofiya Şıqaeva-Mitreska lavandanın Bolqarıstanın çiçək simvollarından biri olduğunu və “bənövşəyi qızıl” kimi də tanındığını qeyd edib. O, sərginin Azərbaycan Dili və Mədəniyyəti Mərkəzi və Yeganə Kələntərlinin rəhbərlik etdiyi “Uni Kids Club” studiyasının birgə layihəsi və bu sərginin ideyasının ötənilki Bolqarıstan qızılgülləri və xarıbülbül ilə bağlı həyata keçirilən layihənin davamı olduğunu bəyan edib.
Azərbaycanlı uşaqların çəkdiyi rəsmlər Çirpan şəhərindəki “Birlik” meydanında festivalın rəsmi açılışı zamanı nümayiş edilib. Festivalın məkanlarından biri olan Spasovo kəndindəki Etnoqrafiya evində isə “Azərbaycandan və Çirpandan lavanda ilhamları” adlı rəsm sərgisi keçirilib. Sərgidə həm azərbaycanlı, həm də Çirpandan olan uşaqların rəsmləri nümayiş etdirilib. Mərkəzin rəhbəri S.Şıqayeva-Mitreska və Etnoqrafiya evinin direktoru N.Marinova sərgini ziyarət edən Çirpan bələdiyyəsi merinin müavini Svetla Dançevaya hər iki müəssisə və sərgilər barədə ətraflı məlumat veriblər.
Belə sərgilər Azərbaycan və Bolqarıstan arasında qarşılıqlı hörmət və dostluğun əlamətidir və bir-birinin adət-ənənələrini, mədəniyyətlərini daha yaxından tanımağa kömək edir. Həmçinin iki ölkə arasında mədəni əlaqələrin inkişafı və gələcəkdə birgə mədəni layihələrin region səviyyəsində həyata keçirilməsi üçün potensial imkanları genişləndirir.