Azərbaycanın Rəqəmsal İnkişaf və Nəqliyyat Nazirliyi hazırda Dünya Bankı ilə məlumatların idarə edilməsi strategiyasının hazırlanması üzərində işləyir.
“Report” xəbər verir ki, bunu rəqəmsal inkişaf və nəqliyyat nazirinin müavini Fərid Əhmədov “Inmerge” İnnovasiya Sammitində deyib.
O bildirib ki, rəqəmsal infrastrukturun əsas aspektlərindən biri məlumat mübadiləsinə imkan verəcək infrastrukturun olmasıdır: “Hökumətlərin öz məqsədləri üçün istifadə edilməli olan məlumatları var. Buna istər yeni məhsulların hazırlanması, istərsə də mövcud məhsulların təkmilləşdirilməsi aiddir. Burada özəl bizneslərin də iştirakı mühümdür. Lakin özəl müəssisələrin özünəməxsus xüsusiyyətləri var ki, bununla bağlı və digər bütün aspektlər Dünya Bankı ilə üzərində çalışdığımız strategiyada öz əksini tapacaq”.