Bu günə Azərbaycan Mərkəzi Bankının (AMB) sterilizasiya portfelinin məbləği (manatla məcburi ehtiyatlar və sterilizasiya yönlü daimi imkan aləti daxil olmaqla) 6,4 milyard manat təşkil edib.
“Report” bu barədə AMB-yə istinadən xəbər verir.
Məlumata görə, bu göstərici yeni pul siyasəti çərçivəsi işə düşəndən bəri (2022-ci il sentyabrın əvvəlindən) 3,9 milyard manat artıb.
“AMB antiinflyasiya xarakterli pul siyasətini və inflyasiyaya təsir imkanlarını artırmaq istiqamətində tədbirlərini davam etdirir. Pul siyasəti alətləri bank sisteminin likvidlik mövqeyi və risklər balansı nəzərə alınmaqla tətbiq edilir. Avqust ayından məcburi ehtiyatların yeni qaydalara uyğun saxlanması, daimi imkan alətinə tətbiq olunan günlük limitin ləğv olunması və müxtəlif müddətli notlarla müntəzəm hərracların keçirilməsi bank sistemindəki izafi likvidliyi minimuma endirib. Böyük nailiyyət kimi ilk dəfə ölkədə banklararası REPO faizlərinin AMB-nin faiz dəhlizi daxilində hərəkət etməsini qeyd etmək olar. Belə ki, oktyabr ayında 1 həftəlik banklararası REPO faizi (1W AINAIB) 8,38 % olmaqla faiz dəhlizinin daxilində formalaşıb”, – deyə açıqlamada qeyd olunub.
