İqtisadiyyat Nazirliyinin dəstəyi, İxracın və İnvestisiyaların Təşviqi Agentliyinin (AZPROMO) təşkilatçılığı ilə Azərbaycan şirkətləri İraqın Bağdad şəhərində keçirilən 47-ci Beynəlxalq Bağdad Yarmarkasında iştirak edir.
Nazirlikdən AZƏRTAC-a bildirilib ki, “Made in Azerbaijan” vahid ölkə stendində Azərbaycanın çay, bitki yağları, qənnadı məmulatları, kolbasa və sosis məhsulları, nar şirəsi, limonad və mineral sular, konservlər və digər məhsullar nümayiş olunur.
Stenddə Kiçik və Orta Biznesin İnkişafı Agentliyi (KOBİA) və AZPROMO təmsil olunur. Burada ziyarətçilərə sahibkarlara göstərilən dəstək və xidmətlər, ölkəmizdə yaradılmış əlverişli biznes və investisiya mühiti barədə məlumat verilir, müvafiq çap materialları təqdim edilir.