Azərbaycan Universiteti Dövlət İmtahan Mərkəzinin təşkilatçılığı ilə mərkəzin elektron imtahanlar korpusunda (Binəqədi rayonu, S.S.Axundov, 50) keçirilən ali təhsil müəssisələrinin sərgisində təmsil olunur. Universitetin stendi 4-cü mərtəbədə yerləşir.
Bu barədə AZƏRTAC-a universitetdən məlumat verilib. Azərbaycan Universitetinin nümayəndələri stendə müraciət edən abituriyentlər, valideynlər və digər iştirakçılara qəbul aparılan ixtisaslar, keçid balları, maddi-texniki baza, təqaüdlər, güzəştlər, beynəlxalq əməkdaşlıq, tələbələr üçün yaradılan imkanlar və onları maraqlandıran digər məsələlərlə bağlı ətraflı məlumat verir, sualları cavablandırırlar.
Sərgidə, həmçinin 3-cü mərtəbədəki 305 nömrəli otaqda Azərbaycan Universiteti haqqında təqdimat nümayiş olunur. Təqdimat hər gün saat 11.00-da başlanır.
Ölkədə fəaliyyət göstərən 40-a yaxın dövlət və özəl ali təhsil müəssisəsinin, habelə müxtəlif qurumların iştirak etdiyi sərginin keçirilməsində məqsəd ixtisas seçimindən öncə abituriyentləri ali təhsil müəssisələrinin imkanları ilə tanış etmək və onların ixtisas seçiminin müəyyən olunmasına dəstək göstərməkdir.
İyulun 30-dan başlanan sərgi avqustun 1-dək davam edəcək. Sərgidə iştirak etmək istəyənlər aşağıdakı link vasitəsilə qeydiyyatdan keçməlidirlər.