Azərbaycan Milli Elmlər Akademiyasının Arxeologiya və Antropologiya İnstitutu ilə Yaponiyanın Teikyo Universitetinin Mədəni İrs Tədqiqat İnstitutu arasında arxeologiya və arxeometriya sahəsində birgə tədqiqat və təhsil əməkdaşlığı haqqında anlaşma memorandumu imzalanıb. Sənədi Arxeologiya və Antropologiya İnstitutunun direktoru Fərhad Quliyev və Mədəni İrs Tədqiqat İnstitutunun direktoru Kazuya Yamauchi imzalayıblar.
Bu barədə AZƏRTAC-a Arxeologiya və Antropologiya İnstitutundan məlumat verilib. Fikir mübadiləsi zamanı tərəflər gələcəkdə memorandumun bəndlərinə əsaslanaraq, birgə arxeoloji tədqiqatların təşkili, arxeologiya ilə əlaqəli interdisiplinar (fənlərarası) sahələrdə, o cümlədən paleozoologiya, paleobotanika və digər istiqamətlər üzrə araşdırmaların aparılması barədə yekdil mövqe nümayiş etdiriblər. Göstərilən sahələr üzrə mütəxəssislərin hazırlanması üçün azərbaycanlı gənc tədqiqatçıların Yaponiyada xüsusi təhsil kurslarına cəlb edilməsi mövzusuna da toxunulub.
Həmçinin görüşdə iştirak edən yaponiyalı arxeoloq, professor Randy Sasaki Azərbaycanda sualtı arxeologiya sahəsinin inkişafı üçün Mədəni İrs Tədqiqat İnstitutunun yardıma hazır olduğunu bildirib.