Bunu “Report”a açıqlamasında Agentliyin sədr müavini Eldar Həsənov bildirib.

O qeyd edib ki, qurum hazırda xüsusi təhlükəli heyvan xəstəliklərinə qarşı profilaktik peyvəndləmə tədbirləri həyata keçirir. Bununla belə, sədr müavininin sözlərinə görə, bəzi vətəndaşlar peyvəndlənmədən imtina edir yaxud tədbir üçün şərait yaratmır, prosesi gecikdirir: “Vətəndaşları peyvəndləməyə laqeyd yanaşmamağa çağırırıq”.

E.Həsənov xatırladıb ki, Azərbaycanda qeyri-dövlət (özəl) baytarlıq xidmətinə keçilib: “Xüsusi təhlükəli xəstəliklər istisna olmaqla digər xəstəliklərin müalicəsi və profilaktikası özəl baytarlarla fermerlər arasında müqavilə və yaxud razılaşma əsasında ödənişli şəkildə heyata keçirilir. Həmin proseslər Nazirlər Kabinetinin 178 saylı qərarı ilə tənzimlənir. Vətəndaşlarımız bilməlidirlər ki, ölkəmizdə artıq baytarlıq xidməti özəl sektordadır və hər bir vətəndaş, hər bir ev təsərrüfatı istənilən baytar həkimi ilə müqavilə bağlayaraq mal-qaraya qulluğu təmin edə bilər”.

O vurğulayıb ki, Azərbaycanın yerləşdiyi bölgə heyvan sağlamlığı üçün risklidir: “5 ölkə ilə sərhədlərimiz var. Odur ki, heyvan xəstəliyi ilə bağlı risklər artır. Eyni zamanda, Azərbaycana mal-qara idxal olunur. Ölkəmizin tranzit daşımalarda potensialını da nəzərə alsaq transsərhəd xəstəliklərə görə risklər olması qaçılmazdır”.