Ulu Öndər Heydər Əliyevin 100 illiyi münasibətilə AMEA Mərkəzi Elmi Kitabxanasının direktoru professor Məmməd Əliyevin və direktor müavini dosent Şəhla Tahirqızının birgə hazırladıqları “Azərbaycan Respublikasında kitabxana-informasiya sahəsinə dair normativ hüquqi sənədlər” adlı toplu işıq üzü görüb.
Bu barədə AZƏRTAC-a MEK-dən məlumat verilib. Bildirilib ki, topluda əvvəllər bu istiqamətdə çapdan çıxmış vəsaitləri məzmunca tamamlamaq baxımından tarixi əhəmiyyət kəsb edən topluda kitabxana işinin hüquqi təminatı olan mühüm dövlət sənədləri, o cümlədən kitabxana və nəşriyyat işinə dair, informasiya haqqında Azərbaycan Respublikasının qanunları, Azərbaycan Prezidentinin fərman və sərəncamları, Nazirlər Kabinetinin qərarları və digər rəsmi dövlət aktları öz əksini tapıb.
Vəsaitin nəşrində əsas məqsəd kitabxana işçilərinin hüquqi mədəniyyətinin, hüquqi şüur və savad səviyyəsinin yüksəldilməsinə kömək göstərməkdən ibarətdir.
Kitabın “Ön sözü”nün müəllifi Bakı Dövlət Universitetinin Redaksiya-nəşriyyat işi kafedrasının müdiri dosent Knyaz Aslandır.
Toplu kitabxana işi sahəsində çalışan mütəxəssislər, rəhbər işçilər, metodistlər, bu sahədə elmi tədqiqat işi aparanlar və geniş oxucu kütləsi üçün nəzərdə tutulub.
