İnnovasiya və Rəqəmsal İnkişaf Agentliyinin (İRİA) dəstəyi ilə “Technovate – Sabah Mələk İnvestorlar Klubu” Azərbaycanda Mələk İnvestorlar Məktəbi (Angel İnvestor School) açılıb.
AZƏRTAC xəbər verir ki, Azərbaycanda ilk dəfə fəaliyyətə başlayacaq məktəbin məqsədi ölkədəki mələk investorlara ilk olaraq nəzəri, daha sonra isə onları klub üzvü etməklə təcrübi biliklərə yiyələnməsini təmin etməkdir.
Proqramdan məzun olmuş iştirakçılar daha çox inkişaf etmiş ölkələrdə, xüsusilə ABŞ startaplarına investisiya qoymaq imkanı qazanacaqlar. Həmin məktəbdə tədris alan şəxslərə startaplardan ibarət portfel yaratmaq, seçimləri düzgün aparmaq və maksimum uğurlu nəticələr əldə etmək istiqamətində nəzəri biliklər öyrədiləcək. Kursda dərslər ingilis dilində həyata keçiriləcək. Dərslər ABŞ-dan olan ekspertlər tərəfindən tədris olunacaq.
Kursun qeydiyyat müddəti noyabrın 1-dək nəzərdə tutulub.
Məktəbin ilkin qrupu barədə ətraflı məlumatı www.angelinvestor.az saytından əldə etmək mümkündür.