Azərbaycanın və Ukraynanın media qurumları arasında konstruktiv və səmərəli əməkdaşlıq mövcuddur. AZƏRTAC ilə “Ukrinform”un tərəfdaşlıq əlaqələri son illər daha da inkişaf etməkdədir.
AZƏRTAC xəbər verir ki, bu fikirləri Azərbaycanın Ukraynadakı səfiri Seymur Mərdəliyev “Ukrinform”un baş direktoru Oleksandr Xarçenko ilə görüşündə söyləyib.
Azərbaycan və Ukrayna xalqlarının çoxəsrlik dostluq münasibətləri olduğunu xatırladan S.Mərdəliyev bildirib ki, bu əlaqələrin inkişafında medianın xüsusi rolu var.
“Sizin rəhbərlik etdiyiniz agentlik Azərbaycanın haqlı mövqeyini daim işıqlandırır. AZƏRTAC da öz növbəsində Ukraynada baş verən hadisələri, müharibə ilə bağlı reportajları yerli və beynəlxalq ictimaiyyətə çatdırır. Ukrayna mətbuatında Azərbaycanla bağlı həqiqətlərin işıqlandırılması bizim fəaliyyətimizin prioritet istiqamətlərindən biridir”, – deyə diplomat əlavə edib.
O.Xarçenko öz növbəsində deyib ki, hər iki ölkənin media qurumları arasında da səmimi münasibətlər və səmərəli əməkdaşlıq mövcuddur. “Ukrinform” maraqlı layihələrə açıqdır və təklif olunan layihələri dəyərləndirməyə hazırdır.
“Ukrayna üçün mühüm tərəfdaş olan Azərbaycanın uğurlarına çox sevinirik. Əminəm ki, “Ukrinform” ilə AZƏRTAC arasında əməkdaşlıq xalqlarımızın və ölkələrimizin münasibətlərinin inkişafına yeni töhfələr verəcək”, – deyə O.Xarçenko vurğulayıb.
Görüşdə tərəfləri maraqlandıran digər mövzular ətrafında müzakirələr də aparılıb.