Azərbaycan Memarlıq və İnşaat Universitetinin (AzMİU) Memarlıq fakültəsinin Memarlıq layihələndirilməsi və şəhərsalma kafedrasının müəllimi Lalə Əzimova “Orhun” mübadilə proqramı çərçivəsində Türkiyənin Bursa Uludağ Universitetinin (BUU) Memarlıq fakültəsində təcrübə mübadiləsi aparıb.
Bu barədə AZƏRTAC-a AzMİU-dan məlumat verilib. Bildirilib ki, universitetin müəllimi səfər zamanı BUU-nun Memarlıq fakültəsinin müəllimləri ilə birgə dərslərdə iştirak edib, qarşılıqlı fikir mübadiləsi aparıb və müxtəlif praktiki layihələr üzərində çalışıb. O, AzMİU və təmsil etdiyi fakültə, həmçinin müasir Bakı haqqında təqdimatlar edib.
Təcrübə mübadiləsi müddətində göstərdiyi peşəkar yanaşmaya görə Lalə Əzimova BUU-nun Memarlıq fakültəsinin dekanı və Memarlıq kafedrasının rəhbəri tərəfindən sertifikat və təşəkkürnamələrlə təltif olunub.
BUU-nun Memarlıq fakültəsinin professor-müəllim heyəti AzMİU-nun RIBA kimi nüfuzlu beynəlxalq sertifikata sahib Memarlıq fakültəsi ilə əməkdaşlıqdan məmnun olduqlarını bildiriblər.