“TRT Türkü” radiosunda yayımlanan “Azərbaycan rüzgarı” proqramının bu həftəki buraxılışı Türkiyədə qeyd edilən 23 Aprel – Beynəlxalq Suverenlik və Uşaq Bayramına həsr olunub. Proqramda azərbaycanlı uşaqlar türkiyəli həmyaşıdlarını bu mötəbər gün münasibətilə təbrik edib, onlar üçün Azərbaycan musiqisi səsləndiriblər.
Bununla bağlı proqramının müəllifi və aparıcısı Səidə Ömər AZƏRTAC-a müsahibə verib.
O bildirib ki, hər il Türkiyədə rəsmi bayram kimi qeyd olunan bu gündə dünyanın hər yerindən, eləcə də Azərbaycandan uşaqlar iştirak edirlər: “Mənim təşəbbüsümlə hazırlanan verilişdə Bakı şəhəri Səid Rüstəmov adına 13 nömrəli musiqi məktəbinin şagirdlərinin təbrik mesajları və musiqi alətlərində ifa etdikləri əsərlər izləyicilərə təqdim olunub. Verilişdə tar, qarmon və qanun alətlərində Azərbaycan xalq mahnıları və milli rəqslər ifa olunub. Proqrama Azərbaycandan telefon bağlantısı ilə Bakı Atatürk Liseyinin 5-ci sinif şagirdi, eyni zamanda musiqi məktəbində tar ixtisası üzrə təhsil alan Əjdər Ömərzadə də qatılaraq Azərbaycan uşaqları adından bütün həmyaşıdlarını təbrik edib, tarda Azərbaycanın dahi bəstəkarı Üzeyir Hacıbəylinin “Ey Səba yeli” əsərini ifa edib”.
Səidə Ömər qeyd edib ki, bu cür proqramların keçirilməsi hər iki ölkənin uşaqları arasında birlik və bərabərliyin möhkəmlənməsi, eləcə də ölkələrimizin gələcəyi baxımından olduqca vacibdir.
O, proqramın həyata keçirilməsində əməyi keçən musiqi məktəbinin direktoru Tofiq Salmanova və bütün kollektivə təşəkkürünü bildirib.