Rəqəmsal İnkişaf və Nəqliyyat Nazirliyi yanında Kosmik Agentlik (“Azərkosmos”) dəyəri 66,5 milyon ABŞ dolları olan “Azerspace-1” telekommunikasiya peykinin sığortalanması üçün açıq tender elan edib.
“Report” xəbər verir ki, tenderdə iştirak haqqı 1 000 manatdır.
Sorğuda iştirak etmək istəyənlər təkliflərini fevralın 6-sı, saat 17:00-a qədər “Azərkosmos”un yerləşdiyi Bakı şəhəri, Üzeyir Hacıbəyli küçəsi, 72 ünvanına təqdim edə bilərlər.
Təkliflərə fevralın 6-sı, saat 17:00-da qeyd olunan ünvanda baxılacaq.
Qeyd edək ki, ötən il dəyəri 80 milyon ABŞ dolları olan “Azerspace-1” peykinin sığortalanması üçün “Paşa Sığorta” ASC cəlb edilmişdi. Bu xidmətlərə görə şirkətə 946,5 min manat ödənilib.
Xatırladaq ki, “Azerspace-1” peyki 2013-cü ildə yerətrafı orbitə buraxılıb. “Azerspace -1”in istismar müddəti 17 ildir.
“Azerspace-1” rəqəmsal teleradio yayımı və internetə giriş xidmətləri təqdim edə, çoxxidmətli VSAT şəbəkələri yarada, məlumatları ötürə və hökumət rabitəsini təmin edə bilər. Onun əhatə dairəsi çox sayda bölgəni – Şərqi, Orta və Qərbi Afrikanı, Avropanı və Orta Asiyanı əhatə edir.