Üç il əvvəl “Azercell”in yeni strateji səhifəsinə başladıq. Bu müddətdə fəaliyyətimiz 4 sütun üzərində qurulub.
“APA-Economics” xəbər verir ki, bunu “Azercell Telecom” MMC-nin hüquq, etika və komlayens departamentinin direktoru Şirin Əliyeva Bakıda keçirilən “GSMA Mobile 360 Eurasia 2024” beynəlxalq konfransında deyib.
O, qeyd edib ki, “Azercell” Azərbaycanda aparıcı telekommunikasiya şirkəti olmağı nəzərdə tutur:
“ESG strategiyası yalnız sözdə olmalı deyil, biz onu daima öz fəaliyyətimizdə tətbiq etməliyik. Bir neçə gün əvvəl ilk ESG hesabatımızı təqdim etdik. Bu hesabat şəffaflıq, səmərəlilik, açıqlıq, brend loyallığı, innovasiya istiqamətlərində məqsədlərimizi özündə əks etdirir.”
“Energetika Nazirliyi enerji səmərəliliyi və istehlakına ciddi önəm verir. Hər bir “Azercell” əməkdaşı məsuliyyətli vətəndaşdır. Biz işğaldan azad edilmiş ərazilərdə yaşıl enerji mənbələrindən istifadə edilməsi istiqamətində çalışırıq. Bu ilin sonuna kimi “Azercell”in yaşıl enerjini dəstəkləyən 37 baza stansiyası olacaq. Həmçinin biz yaşıl ofis siyasətini tətbiq edirik. Şirkət olaraq zərərli tullantıların həcmini üç dəfə azaltmağa müvəffəq olmuşuq. Avtomobil parkımız filtrlənmiş və yenidən istifadədə olan su ilə təmin edilir. Bu istiqamətdə gələcəkdə də çalışmağa davam edəcəyik”, – Ş.Əliyev əlavə edib.