Bəhreyn hakimiyyəti İsrailin Qəzza zolağındakı hərəkətləri fonunda Fələstin xalqına dəstək nümayişi olaraq İsraildəki səfirini geri çağırmaq və yəhudi dövləti ilə iqtisadi əlaqələri dayandırmaq qərarına gəlib. Bu barədə Bəhreynin Deputatlar Palatasının (parlamentin aşağı palatası) bəyanatında deyilir.
“Deputatlar Palatası İsrailin Bəhreyndəki səfirinin krallığı tərk etdiyini təsdiqləyir və Bəhreyn krallığın İsraildəki səfirini ölkəyə qaytarmaq qərarına gəlib. İsraillə iqtisadi əlaqələr də dayandırılıb”, – deyə hökumətin saytında dərc edilmiş bəyanatda deyilir.
Qanunverici orqan qeyd edib ki, bu qərar “Bəhreynin Fələstin məsələsinə və qardaş Fələstin xalqının qanuni hüquqlarına tarixi və güclü dəstəyinin təsdiqidir”. Bəyanatda deyilir ki, Bəhreyn Deputatlar Palatası, “müharibə və hərbi əməliyyatların davam etməsi, habelə İsrailin davam edən təcavüzü səbəbindən Qəzza zolağında və Fələstinin digər bölgələrində günahsız insanların həyatını xilas etmək üçün tədbirlər görülməsini tələb etmək məcburiyyətindədir.
2020-ci ilin sentyabrında Vaşinqtonda İsrail tərəfi ABŞ-ın vasitəçiliyi ilə Birləşmiş Ərəb Əmirlikləri və Bəhreynlə münasibətlərin normallaşdırılmasına dair sənədlər imzalayıb. Üçtərəfli sövdələşmə “Abraham Accords” adlanırdı. Daha sonra Sudan və Mərakeş yəhudi dövləti ilə münasibətlərin normallaşdığını elan ediblər. BƏƏ və Bəhreynlə sülh bağlanmazdan əvvəl İsrail ərəb ölkələri arasında yalnız Misir və İordaniya ilə diplomatik əlaqələrə malik idi. (Tass)