İmişli regional Ədliyyə idarəsi tərəfindən Ədliyyə Nazirliyinin Bələdiyyələrlə iş mərkəzi ilə birgə İmişli şəhərində bələdiyyə üzv və qulluqçularının hüquqi maarifləndirilməsi ilə bağlı növbəti seminar-müşavirə keçirilib.
AZƏRTAC-ın bölgə müxbiri xəbər verir ki, tədbirdə İmişli, Beyləqan, Biləsuvar, Saatlı və Füzuli rayon bələdiyyələri nümayəndələri, regional idarənin rəisi İsgəndər Orucov və Mərkəzin məsul işçiləri iştirak ediblər.
Əvvəlcə Ulu Öndər Heydər Əliyevin və şəhidlərin xatirəsi anılıb.
“Heydər Əliyev İli” çərçivəsində təşkil olunan tədbirdə Ulu Öndər Heydər Əliyevin banisi olduğu yerli demokratiyanın inkişafı, bu sahədə bələdiyyələrin rolu və fəaliyyəti, həyata keçirilən tədbirlər barədə məlumat verilib, müzakirələr aparılıb. Həmçinin bələdiyyələrlə iş portalının tətbiqi, bələdiyyə torpaqlarının idarə olunması ilə bağlı qanunvericilikdəki yeniliklərdən söhbət açılıb. Prezidentin qeyri-yaşayış təyinatlı bəzi tikinti obyektlərinin istismarına icazə verilməsi ilə bağlı əlavə tədbirlər haqqında Fərmanının icrasından, habelə yerli vergilərin toplanmasının artırılması ilə bağlı görülən tədbirlərdən danışılaraq, bələdiyyələrin qarşısında duran vəzifələr diqqətə çatdırılıb.
Sonda iştirakçıları maraqlandıran suallar cavablandırılıb.