BP-nin həyata keçirdiyi layihələrin 75 %-i təhsil istiqamətindədir.
“Report” xəbər verir ki, bunu BP şirkətinin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli “4Sİ Akademiyası” çərçivəsində keçirilən “Milli Proqram” layihəsinin açılış mərasimində deyib.
“Ətraf mühitlə, kiçik və orta biznesin dəstəklənməsi, zəngin milli, mədəni, tarix-irsimizin təbliği ilə bağlı layihələrimiz olsa da, bütün bu istiqamətlərin əsas toplandığı bir ortaq istiqamət təhsil layihələridir. Bura məktəbəqədər təhsil, ümumi təhsil, inklusiv təhsil, peşə təhsili, ali təhsil daxildir”,- deyə o qeyd edib.
Onun sözlərinə, müasir təhsil dedikdə təlimlər çox vacibdir: “Bu gün təqdimatla toplaşdığımız “Milli Proqram” çərçivəsində mövcud olan çox dünya səviyyəli beynəlxalq təlimlərin Azərbaycan vətəndaşları üçün əlçatanlığının təmin olunması istiqamətində olan bu layihə də bizim dərhal diqqətimizi cəlb edib. Ümumiyyətlə, əmək bazarının dəyişməsi barədə kifayət qədər tez-tez danışılır. Yaşadığımız dövr onunla fərqlənir ki, hazırda bu dəyişikliklərin sürəti inanılmaz dərəcədə çoxdur. Bu dəyişikliklərin sürəti bizim hər birimizi, hər bir vətəndaşı dəyişikliklərə daha tez adaptasiya olmağa sövq edir, həvəsləndirir”.