İnnovativ məhsullar yaratmaq məqsədilə keçirilən, Azərbaycanın ən böyük 48 saatlıq texnologiya yarışmalarından biri olan “PASHA Hackathon 4.0” başa çatıb. SOCAR-ın Bakı Ali Neft Məktəbinin (BANM) “Untitled” komandası birinci yerin qalibi olaraq 6000 manat qazanıb.BANM-dən AZƏRTAC-a bildirilib ki, birinci yerə çıxmış komanda “InMerge Innovation Summit” üçün də iştirak hüququ əldə edib. Komanda ali məktəbin informasiya təhlükəsizliyi ixtisasının IV kurs tələbələri Nadir İsgəndərov, İsmayıl Məmmədzadə, Əli Məhərrəmli və kompüter mühəndisliyi ixtisasının III kurs tələbəsi Kəvsər Hüseynovadan ibarətdir. Onlar iştirakçılara verilən 3 tapşırıqdan biri olan “Oflayn QR, NFC və s. istifadə edərək yerli ödənişləri təkmilləşdirmə” probleminə həll yolu təklif ediblər. Təklif isə münsiflər heyəti tərəfindən yüksək qiymətləndirilib.
