Cari ilin iyun ayında Bakıda Beynəlxalq İnvestisiya Forumunun keçirilməsi gözlənilir.
AZƏRTAC xəbər verir ki, bunu Azərbaycan Respublikasının İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Azərbaycan-Moldova biznes forumunda deyib.
“Bu platformadan istifadə edərək xarici tərəfdaşlarlarımızı forumda iştiraka dəvət edirəm. Tədbiri AZPROMO İtaliyanın “The European House Ambrosetti” təşkilatı ilə birgə təşkil edəcək”, – deyə icraçı direktor bildirib.
Y.Abdullayev vurğulayıb ki, AZPROMO və onun Moldovadan olan tərəfdaşları arasında əməkdaşlıq dinamik inkişaf edir: “Son bir neçə il ərzində Moldovanın Sahibkarlığın İnkişafı Təşkilatının (ODA) və “İnvest Moldova” agentliyinin nümayəndələri ilə bir sıra məhsuldar görüşlər keçirilib. AZPROMO ilə “İnvest Moldova” arasında qeyri-neft sektoruna xarici investisiyaların cəlb edilməsi və Azərbaycan məhsullarının ixracının stimullaşdırılması sahəsində əməkdaşlığın genişləndirilməsini nəzərdə tutan Anlaşma Memorandumu mövcuddur. Əməkdaşlıq əlaqələri davam və inkişaf etdiriləcək”.