Bakıda Ukraynanın Azərbaycandakı səfirliyinin dəstəyi ilə “Трети Півні” emalatxanasının müəllif fotoşəkilləri qalereyasının fotosərgisi açılıb.
Bu barədə “Report”a Ukrayna mərkəzinin mətbuat xidmətindən məlumat verilib.
Qeyd olunur ki, Ukrayna Mərkəzində açılan sərgidə bu ölkənin müxtəlif regionlarının etnik geyimlərini nümayiş etdirən fotoşəkillər təqdim olunub.
“Kompozisiyaların hər bir detalı Ukrayna xalqının keçmişini və bu gününü birləşdirən təkrarolunmaz atmosfer və ruhu çatdırmaq üçün diqqətlə düşünülüb. Bu sərgi mədəni irsin dərinliyini hiss etmək və onu ən parlaq vizual obrazlarda görmək üçün imkan yaradır”, – mərkəzdən bildiriblər.
Mərkəzdə vurğulanıb ki, fotosərgi ilə yanaşı, daha bir unikal ekspozisiyanı – istedadlı ustaların – Katriçenko bacılarının yaratdığı kuklaların (motanka) sərgisini də görmək olar. “Kuklalar Ukraynanın 24 vilayəti və Krımın regional tikmə xüsusiyyətlərini əks etdirir. Ukraynaya xas ənənəvi əl işi, hər bir kuklanın ən xırda detallarına qədər düşünülmüş obrazı, rəng qamması, tikmə üslubu, bəzəklər və baş örtükləri – bütün bunlar onları əsl şedevrlərə çevirir. Kuklalar qədimdən ustaların əllərinin hərarətini və doğma torpağa məhəbbəti özündə daşıyan qoruyucu hesab olunur”, – mətbuat xidməti vurğulayıb.
Sərgi Xaqani küçəsi 123 ünvanında keçirilir.