Bakıdakı Rus evində keçirilən “Svaytoçnıe veçera” adlı konsertdə tamaşaçılara parlaq bayram proqramı təqdim olunub.
AZƏRTAC xəbər verir ki, tədbir Bakıdakı Rus evi və Üzeyir Hacıbəyli adına Bakı Musiqi Akademiyasının təşkilatçılığı, paytaxtımızda yerləşən müqəddəs Arxangel Mixail kilsəsinin iştirakı ilə baş tutub.
Bayram gecəsinin əvvəlində Bakıdakı Rus evi rəhbərinin müavini Dmitri Yeqorov, Bakı və Azərbaycan yepiskopu Aleksi iştirakçıları salamlayıb və təbriklərini çatdırıblar.
Rus evinin tamaşaçıları üçün mənəvi və dünyəvi solo, ansambl, xor, vokal, instrumental, musiqi və poetik əsərlərin nümayiş olunduğu xüsusi konsert proqramı hazırlanıb.
Tədbirin aparıcısı, sənətşünaslıq üzrə fəlsəfə doktoru və BMA-nın baş müəllimi Alyona İnyakina Məsihin doğulması və bununla bağlı qeyd olunan xristian bayramların mənşəyi və keçirilmə ənənələri haqqında danışıb.
Bayram axşamı toplaşanlar qarşısında Birləşmiş Xor Hərəkatının Əməkdar xadimi Kristina Əfəndiyevanın rəhbərliyi ilə Bakıdakı müqəddəs Arxangel Mixail kilsəsinin xoru, Azərbaycan Dövlət Akademik Musiqili Teatrının solisti Yuliya Heydərova, Azərbaycan Dövlət Xorunun artistləri Elyar Əliyev və Tofiq Zeynalov, BMA-nın məzunları İnarə Əzimova, Bahar Məmmədova və Emil İsmayılov, BMA-nın tələbəsi Amin Heydərov, müşayiətçi Larisa Zairbekova, Bakı şəhərindəki müqəddəs Arxangel Mixail kilsəsinin uşaq bazar günü məktəbinin yuxarı qrupunun şagirdləri çıxış ediblər.