Naida Pirverdiyeva 2022-ci il BANM MBA məzunudur. Son iki ildir ki, Səudiyyə Ərəbistanında və beynəlxalq arenada idarəetmə sahəsində müxtəlif vəzifələrdə fəaliyyət göstərir. O, məkan əməliyyatları üzrə menecer, işçi qüvvəsi üzrə menecer, qonaqlarla əlaqələr üzrə menecer və təlimçi kimi müxtəlif rollarda işləyib.
Bu barədə AZƏRTAC-a BANM-dən məlumat verilib. Bildirilib ki, Naida Pirverdiyeva, həmçinin Özbəkistan, Türkiyə və Moskvada keçirilmiş “Gənclərlə iş və könüllülük proqramlarının qurulması” mövzusunda beynəlxalq forumlarda gənc ekspert kimi iştirak edib. 44 günlük Vətən müharibəsi dövründə isə Azərbaycan Könüllü Təşkilatları İttifaqında layihələr üzrə menecer vəzifəsini icra edib və informasiya müharibəsində fəal iştirak edib.
O, irimiqyaslı layihələrdə də aktiv rol alıb. Bu layihələrə “Bakı-2015” ilk Avropa Oyunları, IV İslam Həmrəyliyi Oyunları və Formula 1 Azərbaycan Qran-Prisi daxildir.
Fəaliyyət sahələri isə təlimçilik, gənclərlə iş və sosial layihələrdir. Naida Pirverdiyeva, həmçinin gənclərin inkişafına və sosial məsələlərə göstərdiyi böyük maraqla seçilir.