Baş Prokurorluqda “İlin ən yaxşı müstəntiqi” və “İlin ən yaxşı dövlət ittihamçısı” müsabiqələrinin qaliblərinin, eləcə də “Prokurorluğun dostu” təltifinə layiq görülmüş media nümayəndələrinin mükafatlandırma mərasimi keçirilib.
“Report” xəbər verir ki, mərasimdə Baş prokuror Kamran Əliyev, xalq yazıçıları Anar, Çingiz Abdullayev, Mətbuat Şurasının sədri Rəşad Məcid, prokurorluq orqanlarının əməkdaşları və media nümayəndələri iştirak ediblər.
Tədbirdə çıxış edən Baş prokuror Kamran Əliyev bildirib ki, ölkəmizdə güclü, müstəqil və obyektiv informasiya daşıyıcısı olan, eyni zamanda dövlətçilik prinsiplərinə sədaqət nümayiş etdirən, milli maraqların təəssübkeşi olan mətbuatın formalaşdırılması və inkişaf etdirilməsi ilə bağlı dövlət siyasəti uğurla davam etdirilir.
O qeyd edib ki, dövlət başçısının tövsiyə və göstərişlərinin icrası üzrə prokurorluq orqanlarında aparılan islahatların mühüm istiqamətlərindən biri kadr korpusunun dövlətçiliyə sədaqətli, vətənpərvər, savadlı, dünyagörüşlü və yüksək mənəvi keyfiyyətlərə malik gənc hüquqşünaslarla komplektləşdirilməsi, onların peşəkarlıq səviyyəsinin yüksəldilməsi təşkil edir.
Daha sonra prokurorluq tərəfindən 2023-cü ildə görülmüş işlərə dair videoçarx nümayiş etdirilib və nominasiyalar üzrə seçilmiş şəxslər mükafatlandırılıb.