Qəzza zolağında atəşkəs razılaşmasının birinci mərhələsi altı həftə davam edəcək və bu müddət ərzində girovların azad edilməsi və İsrail qoşunlarının anklavdan çıxarılması prosesi başlayacaq. Bu barədə ABŞ prezidenti Co Bayden xüsusi müraciəti zamanı bildirib.
“Birinci mərhələ altı həftə davam edəcək. Buraya tam və yekun atəşkəs, İsrail qoşunlarının Qəzzanın bütün məskunlaşmış bölgələrindən çıxarılması və HƏMAS-ın girov götürdüyü qadınların, qocaların və yaralıların da daxil olduğu bir sıra girovların azad edilməsi daxildir” prezident bildirib.
Baydenin sözlərinə görə, ikinci mərhələ bütün girovların azad edilməsi və qoşunların çıxarılması prosesinin başa çatdırılmasını nəzərdə tutur, üçüncü mərhələdə isə öldürülən girovların qalıqları qohumlarına qaytarılacaq, bundan sonra anklavın bərpası prosesinə başlanacaq. Hər üç mərhələdə atəşkəs qüvvədə qalacaq.