Bakı Dövlət Universitetinin (BDU) Jurnalistika fakültəsinin elmi işlər üzrə dekan müavini, dosent Sevinc Əliyeva Bolqarıstanın Müqəddəs Kliment Oxridski adına Sofiya Universitetinin Azərbaycan dili və mədəniyyəti mərkəzinin 10 illik yubileyi münasibətilə keçirilən “Azərbaycan – Avropa və Asiyanın kəsişməsi” adlı beynəlxalq elmi konfransda məruzə edib.
BDU-dan AZƏRTAC-a bildirilib ki, “Azərbaycan dilçiliyində ədəbi dillə dialektlərin qarşılıqlı əlaqəsinin elmi-nəzəri prinsipləri” adlı məruzəsində Sevinc Əliyeva ədəbi dilin formalaşmasında dialektlərin, ictimai-tarixi amillərin rolunu vurğulayıb. Dialektlərin ədəbi dilin lüğət tərkibini zənginləşdirən əsas mənbələrdən olduğunu nümunələrlə diqqətə çatdırıb.
Konfransda, həmçinin Azərbaycanın Bolqarıstandakı fövqəladə və səlahiyyətli səfiri Hüseyn Hüseynov, Dövlət Dil Komissiyası yanında Monitorinq Mərkəzinin rəhbəri professor Sevinc Əliyeva, Bakı Slavyan Universitetinin prorektoru Nailə Xəndan, Müqəddəs Kliment Oxridski adına Sofiya Universitetinin Azərbaycan Dili və Mədəniyyəti Mərkəzinin direktoru Sofiya Şiqayeva-Mitreskaya, Türkologiya və altayşünaslıq kafedrasının müdiri professor İrina Sarıvanova çıxışlarında Azərbaycan dilinin zənginliyindən danışıb, bolqar dili ilə müqayisəli təhlilini aparıblar.